HOME / ABOUT

在香港做一個真正好用嘅收納盒

APEX Core 3D 係一個香港本地一人工作室，我自己都係陀螺戰士。呢個盒唔係喺枱頭諗出嚟嘅產品 —— 係我自己用開嘅陀螺箱唔夠用，先做出嚟。

FIG.A — 倒角同層紋
3D PRINTED · MATTE FINISH

點解會有 APEX BOX M

標準陀螺箱，得三個位

我一路用開標準陀螺箱去戰鬥 —— 但佢淨係放到三隻陀螺。直到有一日發現手頭嘅陀螺越嚟越多，先發覺唔夠用。之後開始學 3D 建模，做咗雙層設計陀螺比賽盒。https://carousell.app.link/4ZuRW7pAo5b

再到後面嘅時間，發現都係開始唔夠用，就開始構思，想要一個細 size、方便帶去戰鬥嘅箱，但所有配件要齊備，一打開就一眼睇晒成個 set up 同操作。所以目標由一開始就定得好清楚 —— 做一個等於標準陀螺盒兩倍容量嘅盒。之後就由我哋雙層設計陀螺比賽盒嘅尺寸乘二，去度出呢個 Apex Box M 嘅初步尺寸。

呢度要講清楚兩件事。第一，APEX BOX M 嘅翻轉開合結構，係受到 bit to matter 嘅 PROJECT S.P.E.C. 啟發 —— 佢哋個單層翻轉開合嘅 idea 非常好，我認為類似嘅結構，適合放落我呢個兩倍容量嘅盒度。第二，雙層聯動嘅構思之初，係受到 Pablo Inventos 嘅 Mechanical Box 啟發。之後點樣由呢兩個念頭做到而家呢個樣，下面逐步講。

由一個問題，到三十幾版設計

PROCESS 01—07

01

兩倍容量嘅目標

標準陀螺箱得三個位。目標由一開始就定死：做一個容量等於標準盒兩倍嘅盒，細細部但帶得走成套嘢。所以最初落筆嗰陣，就係攞兩個標準陀螺盒嘅尺寸擺埋一齊，由呢度度出而家 APEX BOX M 嘅尺寸。

02

翻轉開合嘅啟發

一開頭其實係想喺上蓋做返細盒嗰個鎖定結構，將陀螺面同固鎖一齊鎖住喺上蓋，再打開。之後受到 bit to matter 嘅 PROJECT S.P.E.C. 單層翻轉結構啟發。連桿幾何我本身唔識，就用 AI 幫手搞清楚原理；明白之後返到 Fusion，逐個角度自己度、自己試出嚟。

03

雙層翻轉開合結構

出去戰鬥通常三隻陀螺一隊。目標係一次帶到四隊出街：上層放主隊同副隊兩隊完整陀螺，下層放陀螺面同備用固鎖，夠再砌多兩隊。一層點都做唔到，所以開始研發雙層聯動嘅翻轉結構 —— 呢個聯動嘅構思之初，係受到 Pablo Inventos 嘅 Mechanical Box 啟發。最難嘅係要保持手感，同時令兩層翻轉暢順同步。呢個位試咗好耐，先做到而家呢個版本。

04

內部擺位

實戰要好多軸心同固鎖，所以陀螺、軸心、固鎖全部逼晒入去，用盡個 size。最花時間嘅係翻轉嗰陣要件件唔郁。你見到每一個形狀、每一條線都有原因，唔係為做而做，而係有功能嘅；所有高低起伏都係打印出嚟、帶入實際戰場試過，反覆調校先定案。前後超過三十版。

05

內置手把同凹凸槽

盒再好，拎出街唔就手一樣辛苦。所以加咗內置手把，再開凹凸槽，一手就撳得起帶出去戰鬥。

06

斜面磁石鎖

一開始完全唔知點閂，做咗一個好核突嘅雙層固鎖結構。後來研究到磁石開合啱用，最後設計成斜面磁石結構 —— 一冚埋就 lock 死，拎起手把即刻走得。

07

外掛槽同 LaunchClip

帶咗陀螺唔記得帶發射器，分開拎一樣麻煩。所以盒身加咗外掛槽，再做 LaunchClip 發射器扣板，一次過帶齊。